Atenton, "Matematiko kaj legaĵoj por ĉiuj" ne estas havebla!
Recenzo de Christian Rivière
Koktelo de problemoj, kuriozaĵoj kaj ŝercoj
Fonto: Revuo Esperanto, aprilo 2004
Aldonita de Andrej Grigorjevskij (2004-04-06)
Ni unue nepre notu ke tiu ĉi libro, malgraŭ sia titolo, ne estas libro pri matematiko, kio krome plage mankas en Esperantio. Ni fermu la parentezon.
Temas pri du apartaj aferoj: unuflanke ludoj kaj divenaĵoj pri aritmetiko, figurita geometrio, aliflanke kompilado de diversaj informoj pri historio, sciencaĵoj, juraj kuriozaĵoj, eĉ ŝercoj, kaj fine pledo por Esperanto. La tuto estas ie-tie prisemita per mallongaj diraĵoj el la buŝo aŭ el la plumo de spritaj famuloj.
Jen do libro por distrado kaj ĝi ofte atingas sian celon. Estas ekzemple interese scii kiom da distanco ni ĉiusekunde moviĝas en la spaco pro la movoj de nia planedo, de nia suno, de nia galaksio (p. 25). Same instruiva estas la paragrafo (p. 10 ĝis 15) pri “la sep mirakloj de la pasinto” kaj imago de sep nunaj (ŝajne trafe elektitaj).
La uzo de la lingvo (foje tradukoj, sed neniu nomo de verkisto estas menciita) estas ĝenerale aprobebla, kvankam regule velkas ĝia kvalito ĝis la fino, kie pli multnombras malglataĵoj. La ekzercoj estas plej ofte simplaj, kelkaj neutile simplegaj, kelkaj pli akraj. Ĝuste pri ĉi-lastaj foje ne sufiĉas la klarigo fine de la libro (solvo-parto ekde la paĝo 81).
Restas la ĉefa problemo, t.e. grava manko de provlegado precipe ĉe tiuj ekzercoj. Abundas la eraroj: problemoj sen solvoj aŭ inverse, solvoj miksitaj aŭ misnumeritaj, nekoheraĵoj inter la problemo kaj la solvo (ekz. problemo 9, p. 23: nevo anstataŭ nepo), multaj nombroj fuŝe skribitaj (loko de la spaceto), subita ŝanĝo de la tiparo, de marĝeno-larĝeco, eraroj en la problemo (nro 6, p. 58), eraroj en la solvoj (n-ro 3, p. 89; n-ro 4, p. 91-92; n-ro 1, p. 93; n-ro 3, p. 98; n-ro 16, p. 101; n-ro 10, p. 104, cetere solvo de la problemo n-ro 9, ...). Pro manko de reviziado, senĉese estas ĝenata la kompatinda leganto pro ĝenerala proksimumeco.
La kovrilo estas bele prezentita, kvankam frazo sub la titolo estas troa, ĉar sensenca.
Fina riproĉo: mankas la dato kaj ISBN-numero. Freŝdata artikolo de Esperanto pravis plendi pri regula eldono de amatoraĵoj!
Opinioj pri Matematiko kaj legaĵoj por ĉiuj
anonima (2022-11-16):
Interesa
Via opinio pri Matematiko kaj legaĵoj por ĉiuj
